港鐵屯馬線開通後，雪梨B不時都會搭下呢條線，今次參觀宋皇臺站，雪梨媽亦順便搵下附近有無其他值得到此一遊既景點。於是，今次雪梨媽就同雪梨B一齊去到係宋皇臺站與土瓜灣站之間既牛棚藝術公園。
位於土瓜灣馬頭角道的前馬頭角牲畜檢疫站（通常稱為「牛棚」），是香港碩果僅存的戰前屠宰場。檢疫站建於1908年，一直用作屠房及牲畜檢疫中心，至1999年年中上水屠房啟用後關閉。前馬頭角牲畜檢疫站於2009年評為二級歷史建築。
牛棚前方用地於2001年翻新及改建為牛棚藝術村，以重置北角油街藝術村的本地藝術家。而後方用地則活化及發展成為牛棚藝術公園，於2019年啟用。
牛棚藝術公園以牛棚歷史為主題，佔地6000平方米，與一般公園一樣有休憩草坪，可以係天台花園慢步觀賞各樣植物。但係黎到有特色主題既公園，重點都係參觀呢度獨有既遺跡，公園保留咗以往牛棚既格局，包括牲口棚(紅磚柱區)、豬欄同牲口棚牆垣。
雪梨B就透過原係水槽既潛望牆睇到入面既苔蘚類植物。園內各處亦有一些不同牲畜既藝術裝置品，配上資訊及簡介，可以一邊參觀公園一邊了解牛棚等歷史面貌。
參觀完藝術公園，雪梨媽就帶住雪梨B去到旁邊既牛棚藝術村，一列紅磚建築物，特別有舊時既異國風情。藝術村有十多組既以往係油街藝術村既藝術家入駐，除咗展覽，平時都會將藝術品放於工作室外，大家走過就可以欣賞。
每個工作室既外都可以睇到唔同藝術家既特色同風格，行完一圈，雪梨媽同雪梨B就去附近醫埋肚，就好充實咁完結咗今日既旅程。
牛棚藝術公園懶人包
自備物品：
防曬用品，蚊怕水，風扇仔，飲用水，乾糧
交通工具：
可以乘搭多條公共巴士路線至中華煤氣公司或九龍城碼頭巴士總站下車，步行至牛棚藝術公園，或乘搭28M或49專線小巴直達牛棚藝術公園
附近景點：
九龍寨城公園 – 舊日城寨的遺址，充滿香港歷史生活氣息的公園
侯王廟，於九龍寨城公園旁，同為香港法定古蹟，三幢式建築設計，廟內存有不少文物，具有文化藝術價值
宋皇臺站南角道行人隧道 – 以海洋為主題的行人隧道，有鯨鯊向其他海洋生物的壁畫
附近美食：
鐵路便當 – 土瓜灣馬頭圍道278A號地舖，滷肉便當、珍珠奶茶
牛棚藝術公園官方網站按此
_____________________
撰文：雪梨媽 （Facebook : 雪梨家族吃喝玩樂Fun ）
想知更多好去處，請按【親子好去處】