呢個唔駛搭飛機嘅「芭提雅之旅」，除咗有無邊際泳池仲連私人沙灘，小朋友一定好開心！Blogger 露營寶寶。車中泊。親子遊分享同囡囡深圳大梅沙親子遊，大家不妨參考一下佢哋的行程啦！
蓮塘口岸過關，搭去大梅沙站都幾有特色，一出閘就係願望塔，風景靚，加100蚊又有航拍，都幾值得去影下留個紀念！去嗰頭就必去海鮮街，有啲似西貢即買即煮，無加工費，款式又多，成枱海鮮，仲有大瀬尿蝦，都只係820蚊埋單！
今次入住深圳大梅沙京基海灣大酒店，酒店位置方便，一出去就有個outlet，雖然價錢唔係好平，但有個大湖係中間，夜晚行下打下咭都好靚，亦有好多嘢食，梗係買返隻乳鴿返去宵夜啦～
第二日食完早餐就去沙灘到玩，酒店有免費shuttle去私人沙灘，亦都可以行入洲際酒店玩佢個泳池，個無邊際泳池景真係有啲似去咗芭提雅，但因無更衣室，如果去記得換定泳衣同拎毛巾！而且附近都好多水上活動，帆船出海，釣魚同潛水都有，夏天都可以再嚟玩下！
最後就去埋東部華僑城行下，薯B又扮公主，襯埋個歐洲景係幾靚嘅，但如果唔係嗰到住，就無咩必要專登上去啦！總結整個行程都幾抵玩嘅，海景房間，又有海鮮餐，3日2夜都適合同小朋友再嚟！
圖文授權：露營寶寶。車中泊。親子遊
IG：camping_bobo