雞肉食譜精選料理8款 簡易烹煮惹味家常菜：電飯煲手撕雞⁡/西檸雞⁡/沙薑雞/台式三杯雞

雞肉食譜惹味家常菜｜雞肉是一種多用途的食材，可以烹調出豐富多樣的料理。無論是平日的家常晚餐，還是聚會時的下酒菜，今日精選的雞肉料理，都能帶給您驚喜與滿足感，讓您能輕鬆在家中享受美味佳餚。

雞肉食譜推介1. 簡易電飯煲薑蔥手撕雞⁡

推介呢個電飯煲手撕雞食譜，煮出來的雞肉好滑又入味。做法非常簡單，把醃好的雞放入電飯煲，再拌入薑蔥汁就攪掂！完全零技巧，放上靚靚餐具上菜，令菜式賣相更加吸引！

材料：雞髀 2隻、乾蔥 3粒切半、薑 8片、蔥 2棵切段

醃料：鹽 1湯匙/ 胡椒粉/ 黃薑粉 半茶匙(上色用可省略)

⁡調味料：乾蔥 3粒切碎/ 薑蓉 2湯匙/ 蔥 1棵切粒、蔴油、 生抽 各1茶匙、砂糖 半茶匙/ 鹽 1/4茶匙、白芝麻⁡

做法：

1. 白鑊烘香白芝麻；雞髀浸鹽水15分鐘除去雪味，醃30分鐘。
2. 乾蔥、薑片和蔥段放入電飯煲，鋪上雞髀，按下煮飯按鈕煮熟。
3. 取出雞髀浸冰水，撕出雞肉。
4. 下油開鍋，炒香乾蔥碎和薑蓉；加入蔥粒，下調味料試味；拌入雞肉和白芝麻即成。

雞肉食譜推介2. 沙薑手撕雞伴花膠

坊間手撕雞食譜多數用鹽焗雞粉，成份有增味劑食用香精。今次用了沙薑粉醃雞一晚再蒸，更加入味！⁡整手撕雞推介用清遠雞，皮爽肉滑，餐廳多數配海蜇，宴客想豪華啲，可一試用花膠代替，花膠先用沙薑高湯煮入味再切絲，味道原來好夾，充滿骨膠原，用作中秋團圓菜式也不錯！

材料：雞 1隻、花膠 1片、薑 5片、蔥 2棵切段、乾蔥 2粒去皮切半

⁡雞醃料：沙薑粉 23g、粗鹽 20g、生油 25g、黃薑粉(可省略)、胡椒粉 適量

⁡沙薑高湯材料：雞湯 500ml、沙薑粉 1茶匙

沙薑醬材料：沙薑粉 約1-2茶匙、幼鹽 約半茶匙、麻油 2茶匙、已炒香的白芝麻/金芝麻 1湯匙

做法：

1. 浸發花膠：花膠不用清洗，直接放上大碟，淋上1茶匙米酒蒸約8分鐘；放入清潔無油的容器，用清水放雪櫃浸發3晚，每天更換清水一次，放冰格保存。
2. 醃雞：雞浸鹽水15分鐘去除雪味，用廚房紙抹乾內外水份；用醃料塗抹均勻，放雪櫃醃1晚入味。
3. 蒸雞：雞放室溫30分鐘回溫，雞肚塞入薑片、乾蔥和蔥段，抹走表面醃料後蒸約25分鐘，熄火焗10分鐘；用筷子插入雞脾肉，如無血水即代表已熟；浸冰水15分鐘令雞皮爽脆，手撕成肉絲。
4. 煮花膠：沙薑高湯煮沸，放入花膠小火煮30分鐘，熄火焗30分鐘，切成幼絲。
5. 沙薑醬材料混合，加入雞絲和花膠絲拌勻即成。

雞肉食譜推介3. 蜜糖西檸煎軟雞⁡

好開胃的一道家常菜式，材料非常簡單，就是雞+檸檬。今次用了半煎炸方式，只要跟足步驟，都可以煎到脆身；要煮到大排檔風味，醬汁金黃色，一定要加吉士粉，味道香好多，再加入蜜糖增加甜味，品嘗食材最原本的味道。

材料：去骨雞脾扒 1-2塊、雞蛋 1隻、生粉

⁡醃料：生抽 2茶匙、老抽 1茶匙、紹興花雕酒 1湯匙、蔴油 1/2茶匙、胡椒粉⁡

檸檬醬汁：檸檬 2-3個搾汁過篩(約75ml)、水 200ml + 50ml、吉士粉 1湯匙、生粉 1茶匙、蜜糖 約4-5湯匙⁡

做法：

1. 雞扒去筋，洗淨抹乾，用醃料醃30分鐘。
2. 預備蛋液和生粉各一盤，生粉混入胡椒粉增加香味；雞扒沾上蛋液，然後拍上生粉；再沾上蛋液，拍上生粉壓實至乾身。
3. 下油開鍋，放入雞扒中火煎約4分鐘至金黃，翻面再煎4分鐘；轉大火，每邊煎約1分鐘至焦香，盛起斬件上碟。
4. 預備檸檬醬汁：吉士粉和生粉加入50ml水混合備用。
5. 檸檬汁和200ml水倒入小鍋煮沸，加入蜜糖，倒入吉士生粉水和檸檬皮，中火煮至濃稠，放涼5分鐘後即可淋上雞扒(醬汁太熱會令脆皮變淋)。

雞肉食譜推介4. 台式三杯雞

⁡整三杯雞材料好簡單，就係醬油、米酒同麻油，自家煮食材當然要認真選擇。為了更加似台灣的味道，除了用台灣醬油，還有台灣紅標米酒，加埋味道更醇厚的黑麻油，特別有風味！記得薑片要切薄，小火慢慢煎香，薑片有麻油香味，再吸收醬汁，放飯下酒一流！

材料：帶骨雞件 650g、薄薑片 35g、蒜頭 5粒、麻油 30ml、醬油/ 生抽 30ml、米酒 50m、冰糖 1-2茶匙、九層塔/羅勒葉 2棵、紅尖椒 (可省略)

雞肉醃料：醬油/ 生抽 1茶匙、麻油 1/2茶匙、米酒 1茶匙、薑 6片⁡

做法：

1. 雞件用醃料醃30分鐘。
2. 下麻油開鍋，放入薑片小火慢煎至捲曲轉金黃色，下蒜粒炒香。
3. 加入雞件，中火煎至表面焦香，加入冰糖碎炒勻；下醬油和米酒，煮至沸後合蓋小火煮10分鐘。
4. 開蓋後中火炒至雞件上色，煮至醬汁濃稠；熄火加入九層塔炒勻即成。

雞肉食譜推介5. 沙薑雞煲

⁡香噴噴的煲仔菜，發現沙薑味道同雞肉好夾，諗起可以整沙薑雞煲。今次冇用沙薑粉，用新鮮沙薑，味道層次更豐富。坊間做法多數用鹽焗雞粉醃雞，入味又上色，不過見到成份有增味劑同味精，其實用新鮮沙薑醃，再用薑黃粉上色都有同樣效果，想顏色再靚啲，建議用三黃雞/黃雞。做法很簡單，雞醃好再炒香，鋪上薑蔥蒜焗熟就大功告成。鋪平受熱會平均，這做法令雞肉唔會煮到過熟，皮爽肉嫩。

材料：雞 半隻、沙薑 40g去皮切件、蒜頭 6粒、乾蔥 6粒切半、紹興花雕酒 2茶匙、蔥、芫茜⁡

醃料：沙薑 40g去皮切碎、生抽 2茶匙、蠔油 1茶匙、紹興花雕酒 2茶匙、薑黃粉 半茶匙、蔥 1棵切段、花椒油 1茶匙、生油 2茶匙、生粉 1茶匙⁡

*沙薑份量 = 已去皮重量⁡

做法：

1. 雞件用鹽水浸15分鐘去除血污和雪味，抹乾水份，用醃料醃1小時。
2. 下油開鍋，爆香沙薑、蒜粒、乾蔥和蔥白，放入雞件炒至表面變熟，盛起備用。
3. 將沙薑、蒜粒、乾蔥和蔥白鋪平，放上蔥段，加入雞件排好（此做法避免雞肉痴底）。
4. 灒入紹興花雕酒，大火煮沸後合蓋小火煮10分鐘。
5. 加入鹽、胡椒粉調味，灑上蔥花/芫茜即成。

雞肉食譜推介6. 栗子冬菇雞煲

⁡秋冬是食栗子的季節，⁡推介桂林錐栗比板栗/真空包裝現成栗子好食好多，因為未去皮，栗子的香味同水份冇咁易流失，栗味香濃，炆完粉粉地又香甜，同雞肉好夾，好啱用來炆煮！

材料：雞 半隻斬件、栗子 半磅、冬菇 8粒、薑 4片、蒜頭 5粒切片、乾蔥 1粒切件、水 300ml

雞醃料：薑 8片、蔥 1棵切段、生抽 2茶匙、老抽 半茶匙、麻油 半茶匙、花雕紹興酒 1湯匙⁡

調味料：花雕紹興酒 1湯匙、冰糖 1小粒、蠔油 3湯匙、生抽 2茶匙、老抽 1茶匙⁡

做法：

1. 雞件洗淨，用醃料醃至少30分鐘。
2. 冬菇用300ml熱水浸30分鐘。
3. 大鍋燒熱水，放入栗子煮2分鐘，再合蓋焗5分鐘，趁熱去皮。
4. 下油開鍋，加入冬菇蒂、薑片、蒜片和乾蔥炒香，然後下雞件拌炒，灒入花雕紹興酒，加入冰糖炒至溶化。
5. 倒入浸冬菇水，加入冬菇、栗子和其餘調味料，中火煮沸後，合蓋小火煮45分鐘。
6. 下生粉水，大火煮至醬汁濃稠，灑上蔥花即成。

雞肉食譜推介7. 楓糖蘋果焗春雞 

焗春雞係西餐廳好常見的菜式，最鍾意用法國黃油雞，細細隻肉質特別嫩滑，兩個人食啱啱好。今次用楓葉糖漿代替蜜糖，味道更加清甜，而且更有營養，加埋蘋果一齊焗，可以中和春雞油膩感。 

材料：春雞 1隻、蘋果 半個切粒、薯仔/ 甘筍/ 蕃茄仔/ 義大利青瓜 

春雞醃料：蒜頭 3瓣、檸檬 半個、牛油溶液 2湯匙、百里香（Thyme）、鹽、黑胡椒碎 

掃面醬汁：楓葉糖漿 3湯匙、牛油溶液 1湯匙 

做法：

1. 春雞解凍後抹乾水份，灑上鹽、黑胡椒碎。
2. 牛油溶液加入檸檬汁和百里香葉，均勻塗抹春雞內外。
3. 將蒜頭、檸檬和百里香塞入春雞內，放雪櫃醃一晚。
4. 蔬菜切件，淋上橄欖油，灑上鹽、黑胡椒碎，鋪上焗盤，然後放入春雞和百里香。
5. 選擇熱風對流烤焗模式，180度焗15分鐘。
6. 牛油溶液加入楓葉糖漿，均勻掃上春雞。
7. 繼續用熱風對流烤焗模式，220度焗30分鐘即成，期間每10分鐘掃面一次。

雞肉食譜推介8. 白汁雞皇芝士焗飯

外面餐廳的白汁雞皇飯，好多時因為成本問題，雞肉同配料份量唔多，白汁又多數用花奶煮，味道比用忌廉/牛奶煮差好遠，所以自家煮，食材可自己選擇，⁡今次用了北海道白雞，肉質嫩滑，而且雞味濃郁。另外加了香腸味道更加豐富，今次只用牛奶整白汁，原來效果都好好，冇咁肥膩更健康。最想highlight今次用的芝士混合咗3種北海道十勝天然芝士，超香濃又有拉絲效果，焗出嚟金黃色好靚！

材料：去骨雞脾肉 300g去皮切粒、甘荀 1條切粒、薯仔 1個切粒、蘑菇/ 香腸 / 荷蘭豆 切粒、洋蔥 1/4個切粒、鮮牛奶 500ml、芝士碎 70g

雞肉醃料：生抽 2茶匙、老抽 半茶匙、生粉 1茶匙、砂糖 半茶匙

麵糊材料：低筋麵粉 50g、牛油 50g、百里香 1棵⁡

做法：

1. 雞肉解凍，用醃料醃30分鐘。
2. 薯仔粒浸水15分鐘，大鍋加水下1茶匙鹽，煮15分鐘。
3. 製作麵糊：煮溶牛油，加入百里香和麵粉攪拌均勻。4. 下油開鍋，加入洋蔥炒至軟身，下雞件炒至金黃焦香。
4. 加入其他配菜炒香，倒入牛奶小火煮沸，分2次下麵糊煮至杰身，加入薯仔。
5. 焗盤鋪上米飯，倒入白汁，灑上芝士碎，放入焗爐200度焗5分鐘至芝士融化，再用230度焗約8分鐘至芝士焦香即成（每個焗爐溫度不同，建議自行調節時間）。

圖文授權：IG@kiuu922

想尋找更多煮食新意請看【自煮料理】