澳門親子遊｜小朋友考完試，如果想近近地旅行兩日一夜不如考慮下澳門！Blogger 為食爸爸與Asher的親子日常分享咗帶囝囝去澳門兩日一夜嘅行程簡介，玩埋新開幕全澳門最大嘅水上樂園同埋四層高嘅遊樂場玩，呢兩個設施都喺新濠影滙入面，所以佢哋今次就選擇入住新濠影滙酒店方便去玩！
新濠影滙交通都幾方便，除咗酒店穿梭巴士之外，新濠影匯仲連接住澳門輕軌站，喺舊城區食完嘢之後搭輕軌去酒店，為食爸爸大概13：30左右到酒店，當時已經有唔少人排隊check in，不過酒店人手都幾充裕，15分鐘左右已經可以攞到鎖匙上房。
今次訂嘅係酒店入面最平嘅Celebrity Room，佢哋揀咗大床房，張床真係好大，200cm x 200cm，好啱我哋一家三口瞓埋一齊。
雖然入住最平嘅一款房型，但景觀非常好，除咗有海景之外，仲望到輕軌站同埋機場跑道，Asher喺房入面就可以睇到飛機、輕軌、輪船、澳門巴士同埋的士等等嘅交通工具，非常興奮。
Asher一家喺酒店換好哂泳衣之後就直接去水上樂園，酒店住客有專用通道直接進入水上樂園，玩完之後抹一抹身就可以直接返酒店房先沖涼，非常方便！樂園仲提供免費儲物櫃，先到先得。 水上樂園室內恆溫27-29度，而水溫亦恆溫28-30度，一年四季全天候都啱入場玩。
今次呢個行程最重要就係要去剛剛開幕全澳門最大嘅新濠影滙水上樂園。樂園分咗室內同戶外兩個園區，室內園區以太空做主題，入面有 好多個遊樂設施，包括：極速水上過山車、衝浪模擬器、 7 個滑水道設施、造浪池、天際星空池、星空激流之旅、同埋一個挑戰平臺跳水同攀岩歷險嘅天崖海角。
Asher喺室內園區最鍾意玩就係太空控制台，呢個專為小朋友設計嘅太空堡壘有螺旋滑水道、滑梯、大水桶、雨林、同埋多枝噴水槍，呢個刺激度對小朋友嚟講真係啱啱好。我同老婆就輪流玩咗一陣刺滑水道，不過都唔敢挑戰極速水上過山車，最後由室內連接到室外天際星空池打完咭影靚相之後就出去戶外園區。
戶外園區有5條高達20米嘅滑水道同埋多條滑梯，但都未啱Asher玩，反而佢喺黃金大水桶呢個小朋友專屬嘅嬉水設施就玩得好開心，另外戶外園區仲設有專為小朋友而設嘅小旋風同滑水道，Asher體驗完都話真係好刺激。
新濠影滙酒店 Studio City Hotel
地址：路氹城填海區G300，G310及G400地段
電話：+853 8865 8888
新濠影滙酒店水上樂園 Studio City Water Park
地址：澳門路氹連貫公路, 新濠影滙三樓
電話：+853 8865 6767
圖文授權：為食爸爸與Asher的親子日常