香港都市人缺乏運動，最啱就係放假一家大小去郊遊，而今次介紹嘅龍虎山是香港遠足挑戰嘅其中兩個景點。唔好諗住遠足挑戰就會好難，其實今次要行嘅龍虎山係小朋友都會行得到，唔係行山老手都行得到。
龍虎山係香港其中一個郊野公園，佢嘅特色係留有其中一個英治時期嘅炮台，而呢個炮台仲係香港現存嘅一個二級歷史建築。為咗令到成日留係屋企嘅雪梨B都可以出去行吓，今次雪梨媽就帶埋雪梨B去龍虎山感受一下大自然。
星期六早晨，嗰日幾好天氣，雪梨媽同雪梨b就由山頂出發沿盧吉道向下行去龍虎山。全程都係已開發嘅石屎路，非常易行。沿路有唔少遊人，仲有人沿山路跑步㖭。松林嘅當中有幾道好似門咁嘅石造建築物。
雪梨b對於呢幾個建築物表示好奇，即刻問係乜嘢來。雪梨媽當然有做足資料搜集，同雪梨b 講解呢一個松林廢堡嘅歷史作用：「呢個廢堡就係香港抗日時期嘅作戰設施。」
雪梨媽係沿路都同雪梨b講左唔少嘅香港歷史，雪梨b喺有農舍、河流及瀑布等自然景色嘅龍虎山行程中都玩得好開心。
龍虎山資訊懶人包
難度：半粒星星（五粒星星最高）
適合年齡: 任何年齡
交通工具：
由薄扶林水塘道出發
37A巴士、90B巴士、970巴士 由薄扶林水塘道下車。
由香港大學站出發
由香港大學港鐵站行5分鐘，23巴士、40M巴士、103巴士由香港大學東閘下車。
附近景點: 西高山、摩星嶺、薄扶林水塘
附近美食:
- 一念素食(逸夫教學樓地下) 核桃豆漿、香芒鮮猴頭菇、蜜汁素叉燒配脆米
- Cafe330(莊月明文娛中心2樓) 檸檬芝士雜菌意粉、摩洛哥雞鎚有機米飯
- 學。食(綜合大樓地下3B號舖) 汁燒牛肉飯、玉子燒、吉列豬扒野菜飯
_________________
撰文：雪梨媽 （Facebook : 雪梨家族吃喝玩樂Fun ）
想知更多好去處，請按【親子好去處】