今個夏天，悶熱難擋，又濕又熱嘅天氣，令溫暖嘅腋窩裡面，細菌及真菌更易滋生，處理得唔好，就會形成臭狐，諗起都頭痕！
皮膚科醫生提醒大家，臭狐嘅成因，同大汗腺嘅分泌物有關，大多數喺青春期，由於性荷爾蒙嘅刺激而產生。要知道，臭狐其實唔會影響人體健康，但產生嘅氣味就會令患者倍受心理壓力。只要可以減少到細菌結合同大汗腺嘅分泌物，就可以有效改善臭狐！
臭狐徵狀
臭狐嘅徵狀，有腋下發出異味，腋下產生黃色汗漬，而且汗液較一般人黏稠，更會散發阿摩尼亞味，並且患者會感受到耳道潮濕黏膩。
改善臭狐方法
皮膚科醫生指出，要改善臭狐，可以從以下幾方面著手：
1. 保持清潔
運動或流汗後，應盡快換返套乾淨衫。並且盡量保持皮膚乾燥，減低異味。
2. 改善飲食
肉類、奶類製品，如果攝取過量，會刺激皮脂腺同頂漿腺分泌。所以想改善，應盡可能減少進食肉類同奶製品，食多啲蔬菜水果喇！
3. 除毛
去除腋下嘅毛髮，保持腋下清潔，防止汗水同細菌喺腋下毛髮累積，都可以改善異味問題㗎！
4. 止汗劑
市面出售嘅止汗劑可以抑製汗水、減少異味，適當使用都有助減少困擾！
延伸閱讀：消委會推介 6款獲高評分止汗劑 最平低至$23.9 + 選購要訣+ 使用妙法
5. 藥物治療
可以去睇皮膚科醫生，由醫生檢查後開出相關藥物，幫助減少排汗、改善異味！
雖然臭狐會有味道會產生，好容易影響到人際關係同社交印象，但要記住！臭狐唔係病，只要改善到情況，大家又唔駛過分擔心影響心情！
圖片來源：photoac