近日不少新聞或家長間都提及「肺炎支原體感染」，香港個案急速上升中， 「肺炎支原體感染」會否是新的常見傳染病，不少家長感到擔憂，因同時多種病毒來襲，兒科專科 – 陳亦俊醫生為大家分享更多資訊。
Q：「肺炎支原體感染」是一種什麼疾病？ 當中支原體感染是什麼？
A：肺炎支原體感染係一種感染咗肺炎支原體細菌所導致嘅傳染病嚟嘅。
Q：「肺炎支原體感染」的病徵會跟流感、傷風、感冒相似嗎？
A：一般肺炎支原體感染會導致急性呼吸道感染或者俗稱的「上呼吸道感染」，大多數小朋友會發燒、咳嗽、喉嚨痛、疲倦，甚至頭痛；有部分小朋友如果感染係偏向於嚴重呢，就可以導致到肺炎情況出現！
Q：會否因感染「肺炎支原體感染」而引起其他疾病嗎？
A：部分個案中，若肺炎支原體感染去到肺度，就會導致肺炎，亦都有少量個案甚至會導致其他併發症，包括：腦炎、腎功能受損，甚至可能導致到溶血性貧血等比較嚴重的併發症。
Q：「肺炎支原體感染」傳播途徑是什麼？
肺炎支原體係透過患者咳嗽或者打乞嚏嘅時候所產生嘅飛沫，喺人與人之間當中傳播，呢個細菌亦都可以透過直接接觸患者嘅鼻喉嘅分泌物傳播或接觸了有患者分泌物嘅物件而間接去傳播。
Q：什麼年齡人士較易患上？
A：任何年齡人士，都有機會患上肺炎支原體感染。
Q：在什麼地方長時間逗留都有機會較易患上？
A：由於肺炎支原體係透過飛沫或直接接觸患者導致傳播，如果在人煙稠密嘅地方或者係好多人去聚集嘅地方，例如酒樓、戲院等等呢啲比較多人去聚集嘅地方，逗留嘅時間又相對上較長，感染的機會率會提高。
Q：小童不幸感染「肺炎支原體感染」，如何醫治，會服用什麼藥物？
A：如果小朋友不幸感染了肺炎支原體感染，其實唔需要太擔心。及早去睇兒科專科醫生醫治，如果係輕微嘅上呼吸道感染，通常兒科醫生會處方一啲關於支援性的藥物，即係包括：退燒藥、止咳、收鼻水、化痰、喉嚨消炎嘅藥物等等。
Q：如小童症狀較嚴重，並出現氣喘或呼吸困難，應如何處理？
A：但如果係嚴重病徵時，或者確診咗小朋友患有呢個肺炎支原體細菌，醫生都會處方一啲特別係針對肺炎支原體嘅抗生素。
當小朋友發現一啲嚴重嘅病徵，包括：氣喘、呼吸困難、好大機會係有肺炎，甚至有其他病徵嘅話，家長必須要盡快及早去向兒科專科醫生求診。除了醫生會考慮處方抗生素之外，亦會視乎小朋友嘅病徵，作出不同的治療方案，舉例如果有氣管收縮嘅情況，醫生可能會考慮處方氣管擴張性藥物，甚至會建議到醫院做檢查，包括：照肺部X光，確保有冇肺炎嘅情況發生；或處方一些支援性嘅藥物及看看小朋友血含氧指數是什麼情況。如果呼吸困難，視乎小朋友的情況，可能需要畀氧氣，甚至更高嘅呼吸系統支援。
Q：聖誕長假將近，不少家長跟小童外遊，在外地容易受到感染嗎？有什麼預防措施？
聖誕長假期，好多家長都會帶小朋友外遊，喺交通上如搭飛機或搭船時，係呢隱蔽式嘅地方時候，就容易會令到小朋友感染。或當小朋友去了人煙稠密嘅地方，如：酒樓、餐廳、遊樂場等等嘅地方，都會較容易感染肺炎支原體細菌。
要做好預防，由於肺炎支原體未有預防針去預防，所以好多時都會著重於做好個人衛生，包括：建議小朋友保持雙手清潔，尤其如果觸摸了口、鼻或眼部前，及進食前、如廁後，都必須要清潔雙手。建議家長用一啲我哋常用嘅梘液或者清水，清潔雙手，亦在小朋友搓手時提醒最少清潔20秒，這可以有效清潔手上嘅污漬及減低感染機會。
另外，亦提醒小朋友打乞嚏或咳嗽時，要用紙巾揞口或鼻，建議小朋友保持均衡嘅飲食，特別是維他命C的吸收，亦都可以提升身體抵抗力，恆常運動，甚至足夠休息亦你可減少小朋友感染肺炎支原體嘅機會；亦都提提家長，注意小朋友睡眠時間同埋質素，可幫助提升小朋友抵抗力。另外，就算係飲用清水令身體有足夠水份，亦可提升身體健康情況，可減低感染機會。
如果發現小朋友有傷風感冒嘅病徵，都建議盡快去睇醫生，作出適當嘅診治，不過整體嚟講，肺炎支原體雖則一般在社區幾常見，不過好多時都會係導致一啲輕微嘅上呼吸道嘅病徵為主，所以家長都唔需要過份擔心。
