科學館恐龍展免費入場 —— 香港科學館為慶祝回歸25周年，特別舉辦「香港賽馬會呈獻系列：八大．尋龍記」恐龍展覽，展出包括暴龍、三角龍及棘龍等共8組人氣超高嘅恐龍化石真品，仲有完整度極高嘅化石骨架！小朋友可以觸摸到真嘅恐龍化石，仲有機會同咁多恐龍一齊大覺瞓！展覽期間，科學館會豁免入場費，聽日（7/7星期四）開放網上預約，今個星期五起就有得睇喇！
入場梗係要睇大人細路都咁著迷嘅暴龍啦！今次展覽除咗有得睇化石真品，仲有1：1還原嘅恐龍化石骨架，三角龍更加係全球首次展出！此外，仲有小朋友耳熟能詳嘅棘龍、異特龍、西龍、哈特茲哥翼龍和幼齡蜥腳類恐龍嘅化石真品，唔係齋睇，仲開放俾大家觸摸，了解石頭同化石到底有乜分別！
更好玩嘅嘢好戲在後頭！除咗參觀同可以觸摸化石之外，今次科學館仲將會喺8月舉行5節嘅「與龍同眠」留宿活動，費用只需312元，對象為9-12歲小童，每名小童須由一位家長陪同，不另收費。活動每節會俾30個家庭參與，名額只係得60個，今個星期五（8/7）開始接受報名！想同小朋友過一個與別不同、同眾多恐龍一齊過夜嘅難忘暑假，記得早啲報名啊！
「香港賽馬會呈獻系列：八大．尋龍記」恐龍展覽由今個星期五展覽到11月16日，科學館豁免入場費，但結果想參觀，要記得佢必需要透過展覽嘅網上預約系統去預約！預約由聽日（7/7星期四）凌晨12點開始登記，可以預約到未來七日嘅入場時段。但大家要注意！每個時段只有大概750個名額！想快人一步帶埋小朋友睇恐龍，大家就要乖乖喺電腦前面捕實喇！
香港賽馬會呈獻系列：八大．尋龍記參觀報名連結 https://bit.ly/3P2Rg9i
「與龍同眠」留宿活動資訊 https://bit.ly/3uu3FLv
