10媽9禿？生完B就似被BB吸光精氣，產後脫髮是必然？每日甩頭髮甩到心慌，就如My Little Airport首歌《驗孕的下晝》歌詞所言：「總在青春過後，留不住舊髮型」！以下為32歲新手媽媽A矢志植髮的心路歷程，她更將搜尋植髮及手術過程公開，希望同路人可為她帶來一點共鳴。
以下為媽媽A親手撰寫的文字記錄：
「由細到大，我嘅額頭都又大又寬，所以可以選擇嘅髮型唔多，主要都係齊蔭，唔夠膽露個額頭出來，因為畀頭髮焗住搞到額頭好容易生暗瘡。
隨着年紀越嚟越大，髮綫愈來愈向後移再加M字額，期間我都嘗試過好多方法去改善，例如搽生髮水或者營養精華，但係如果嗰個位本身冇毛囊，就算你查咩都好，都唔會生頭髮，之後我就放棄咗，諗住一世都係呢個髮型就算，只要遮住大家睇唔到就得，但其實如果大風或者跑步，個額頭都係會露出來。
真正令我再重視返呢個問題係我生完BB之後，生產後我嘅脫髮問題非常之嚴重，唔單止髮線又再進一步向後移，連原本有頭髮嘅地方都變得好稀疏好薄。
本身髮量就會隨着年紀漸長而變得越嚟越稀疏，但我只係32歲，髮綫同髮量已經咁稀疏，我想像唔到我40幾50歲嘅時候髮量會變成點。
我上網做咗一輪資料搜集後，包括網站、FB page、YouTube，發覺植髮都愈來愈普遍同年輕化，因為除咗環境飲食生育影響之外，遺傳都會影響到髮量，所以好多人年紀輕輕已經有脫髮情況。
此外，植髮已經唔單止係地中海男士嘅專利，原來好多女性都受高額M字額影響，因為額頭嘅大細同型狀都好影響面型，同埋髮量髮綫都好影響到視覺年齡，所以近年年輕女性植髮都變得愈來愈普遍。
我自己不停諗：無論幾多歲嘅女性，結咗婚又好，生咗BB又好，都有追求美麗嘅權利，更何況我依家只係30幾歲，又有足夠嘅經濟能力去令到自己變得更好，所以決定踏出第一步！
我咨詢嘅第一間公司係一間上市大公司，佢嘅業務好廣泛，而植髮只係佢其中一項業務，而且佢可以傳統植髮同人工植髮，人工植髮係唔駛攞自己本身頭髮，佢哋用人工髮線放入需要頭髮嘅位置，但最後我都無揀到，一來因為佢涉及嘅行業真係好廣，我覺得佢喺植髮呢一方面唔係好專，二來佢賣好多廣告，費用相對會更貴。
亦因為我想植前面嘅頭髮，人工頭髮已經固定咗長度及粗度，變相到時頭髮有機會變得好唔自然，同埋又有發炎危機，始終係人工物料，做得植髮除咗想改善頭髮嘅問題之外，亦都希望最後嘅成果係自然，而唔係好似戴咗假髮咁，所以醫生嘅經驗手勢同埋審美觀都好影響最後出嚟嘅髮型。
最後我揀咗一間傳統植髮診所做FUE植髮（毛囊單位摘取術），過程係由我後尾枕位置攞4000條頭髮出嚟，然後植入前額(有啲診所以束收費、有啲以條收費，因為一束頭髮可以有1條、2條甚至3條，所以如果話攞3000束頭髮，其實不知實際頭髮數量，我個人覺得以條收費最均真，3000條就一定3000條)。
做諮詢當日，診所先幫我做頭皮測試，睇吓我後尾枕髮量是否足夠以及粗幼度是否適合，然後醫生都會按照我嘅面形五官比例設計植髮位置，並唔係髮線愈落愈好，醫生最想做出嚟嘅效果就係自然啱比例，設計完髮線之後佢會評估大概我需要種植幾多條頭髮，然後就有姑娘報價，確認之後就會交訂金。
手術當日姑娘會幫我剃走取髮區(長頭髮女士完全唔洗擔心，頭髮一放落來，係完全睇唔到剃咗頭髮嘅位置）醫生消毒之後，就會係頭皮打麻醉，然後開始取髮，醫生會卡罅卡罅咁間隔取髮（因為後尾枕嘅髮量普遍較多以及健康，不容易脫落，大部份人都係前額或者頭頂容易脫落，後尾枕普遍都好茂盛）取走毛囊嘅位置唔會再生頭髮，但本身後尾枕位置普遍都好茂盛，就算攞走幾千條頭髮都唔大影響。
趴係手術床大概兩個多小時之後，醫生就取完毛囊（因為只係局部麻醉，我期間仲喺度玩手機瞓咗一陣，因為完全無痛楚）。
食咗45分鐘lunch後，就又要上手術床進行植髮，姑娘係取髮時已經將我嘅毛囊根據數量及粗幼度排列好，到植髮時，醫生就會根據佢嘅經驗將唔同粗幼數量嘅毛囊植入我嘅前額，需時大概兩個幾三個鐘。
植髮之後嘅15日非常緊要，因為啱啱植好嘅頭髮未鞏固，如果碰撞或者大力抓會好容易剝落，所以姑娘有教我點保養。
當毛囊鞏固之後就會開始脫髮期，種植嘅頭髮會自然脫落，呢個係一個自然現象，然後佢就會慢慢生番新嘅頭髮，最後留到你想要既長度就可以了。
同埋我發現醫生唔止將我無頭髮嘅位植咗髮，可能因為我原本髮線位嘅頭髮都已經相對稀疏，所以幫我植上咗少少！」
編按：愛美的心人人皆有，感謝媽媽A分享手術過程及照片，供各位Mame參詳一但由於她也是剛完成手術不久，未能提供植髮完全完成的照片，請各位Mame自行斟酌成效，MameShare並無替任何植髮公司作宣傳。