想同小朋友去內地按摩，不妨參考一下Blogger MuiGs 媽媽的分享！MuiGs 媽媽表示兩個囡囡不嬲都鍾意去揼骨，成日都話想去。原因係佢哋鍾意無限放題睇電視，任飲果汁，任食水果同埋任食雪糕 。MuiGs 媽媽就介紹今次呢個場，表示仲好玩，因為有得任玩VR，大人細路都啱玩。
120cm 兒童係收半價，所以小朋友只是 $99，入到去就先沖涼，跟住就去浸浴。小朋友超鍾意，唔捨得上水！一出到去就見到VR嗰個位，小朋友已經發晒光，VR 係無限任玩嘅。 不過去到夜晚12點就會收，因為可能太嘈大家都要休息。
飲品種超多，仲有好多生果款式，都係門票包埋任飲任食㗎。另外仲有賽車，打鼓，電競， switch，唱K，電影院。如果需要過夜，又好大嘅太空艙空間。自己攞被同枕頭就可以。或者唔想瞓太空艙，仲有啲帳幕。
咁就講吓MuiGs 媽媽覺得今次嘅體驗覺得點啦！佢哋認為好啱有小朋友嘅一家去玩，因為大人細路都有得玩VR任玩。小朋友玩幾次已經值回票價。空間大，同埋乾淨企理，按摩唔收小費，星期六晚去都唔算多人，玩任何設施都唔係點需要排隊。另外，場地可以免費泊車，記得俾錢嗰陣時同佢哋講有揸車嚟。
跟住有啲可以進步嘅空間，可能呢個地方冇收小費/commission，所以服務冇之前去其他湯泉地方咁周到。例如，大廳好容易搵位，因為冇乜人。但係想搵一個服務員都唔容易，之後坐低又冇人攞被，同埋冇得嗌水果有人攞過嚟呢個服務。不過對我嚟講都唔係好大問題，反而就鍾意唔收小費。
自然湯泉 （珠海）
- 地點：珠海市香洲区拱北街道桂花北路112
圖文授權：MuiGs