今次MuiG媽媽分享一家去咗珠海毛林金灣大酒店度過2日1夜！點解會揀去呢度呢？因為住呢度酒店，就可以玩佢哋嘅Playhouse同埋冰雪運動城。 兩個地方都好大㗎，夠玩兩日 。
呢間酒店新開嘅，記憶中一年未夠，所以其實好新淨，不過MuiG媽表示設計就比較老土，而佢哋就揀咗主題房。普通房就會平啲，主題房就差唔多一個Double 。提提大家如果book房，記得睇清楚有冇包埋玩樂嘅門票同埋包幾多張。最好訂房嘅時候就揀啱就應該最抵。如果揸車上嚟有大把停車位置，佢哋架車就正正停響大門門口 。
毛林金灣大酒店・冰雪運動城
入場嘅時候只要交按金就可以借佢哋啲衫，或者自己帶件厚褸都OK。 因為始終冇滑雪嘅成份，裏面唔係話十分凍。 甚至乎見到有人着T恤 。溜冰鞋，頭盔，護踭護膝全部都包埋嘅。
裏面有溜冰場，3條水泡滑梯 ，提提大家水泡滑梯一定要帶頭盔同埋裝備，中間嗰條都有啲刺激㗎，未必適合較細的小朋友，因為要捉實水泡哦！
另外仲有冰上碰碰車，玩雪/落雪區，釣魚嘅遊戲機，同埋睇4D影片。小朋友們勁鍾意玩釣魚嗰個遊戲機（呢個好熱門，好難搵位㗎）同埋就好鍾意玩雪 。 我哋嗰日冇乜人，所以就玩得好舒服 。
毛林金灣大酒店・兒童遊樂園
住酒店除咗可以玩雪場之外，仲有大型Playhouse——珠海毛林金灣兒童遊樂園。Playhouse有兩層。有波波池，碰碰車，打機， VR，彈床，攀爬，同埋war game。因為設施都好廣泛，所以大概1-10歲都有嘢啱玩嘅。就算唔啱玩，亦都可以隨時返去雪場嗰度玩 。
MuiG媽一家住一晚酒店，可以玩兩日。入住嗰日同埋check out 嗰日都可以任玩。所以book酒店時記得記得記得揀包門票嘅package 。另外對面就係華發商都商場。裏面好多嘢食同埋有卡丁車玩。
珠海毛林金灣大酒店
- 地址：珠海市金湾区金河东路577号
圖文授權：MuiGs