過去的復活節公眾假期，Blogger媽媽 有個過度活躍媽 就分享咗佢哋一家人「港車北上」珠海海泉灣2日1夜的體驗，大家嚟緊都有打算北上的話，不妨參考下！
活躍媽怕假期人多，所以7:45am已經喺屋企出發，由港珠澳珠海口岸駕過去都要1小時左右，今次入住的是新開幕的「帆酒店」普通房間，開咗半年左右！自駕嘅家庭可以免費泊車，而無自駕嘅，園區內有golf車免費載客人。預訂方面就喺WeChat 中旅珠海海泉灣度假區內預訂，雖然只係預訂咗普通房間，但性價比非常高，酒店廁所係電子廁所，全部潔具係用Hansgrohe。
早餐勁多選擇，有芝士、有cold cut、沙律都有好多款，而且仲有泰式青木瓜沙律！
珠海親子遊 免費playroom任玩
價錢方面：一家四口酒店房一間+遊樂場+動物園+溫泉+早餐=¥1250(矮過120cm係免費入場，所以細佬乜都唔洗錢！) 酒店內有一playroom，免費任玩。環境都幾好！另外，有一個半室外位置嘅遊樂設施，都幾大。無冷氣，不過有蓋！
珠海親子遊 小矮人萌寵樂園
酒店package包咗動物園和遊樂場，先介紹動物園：小矮人萌寵樂園，環境好好，帶小朋友一流，由於活躍媽細仔係草泥馬愛好者，所以係必去！雖然包左入場費，但裡面有不少自費項目，由於package太抵，所以即使要額外俾錢，都覺得勁抵，買紅蘿蔔餵動物¥10，買奶餵豬好似¥20，另外有手套/夾提供俾小朋友餵動物。
兩個小朋友仲玩埋騎馬，騎馬體驗¥138/10分鐘，個馬圈好大，同之前普通兜一個圈唔同，一家四口大概逗留左喺動物園2.5小時，由於一家人住喺帆酒店，所以喺海泉灣渡假區內泊車都係免費。
小矮人萌寵樂園
地址：珠海市金灣區海泉灣路海泉灣度假區内
珠海親子遊 套票包括溫泉
海泉灣套票係包埋浸溫泉，由帆酒店行去海洋溫泉係好近，應該5分鐘內，媽媽同小朋友去完動物園，食完晚飯，就去浸溫泉，溫泉舊舊地，當然同日本浸的感覺完全不同，不過海洋溫泉都好多唔同池選擇，其中有個位置係for小朋友，有滑梯。啲小朋友當嬉水池玩。
另外有個位置浸住溫泉睇戲 ，睇住戲浸都幾正，而且有好多不同味道的溫泉，例如：紅酒、綠茶、咖啡等。媽媽覺得當歸味最逼真，有得扮喺「死海」浸，如果浸浸下口乾，仲有免費紅棗茶、薑茶、鹽水任飲！
海泉灣海洋温泉
珠海市金灣區珠海海泉灣度假區内
珠海親子遊 套票包括神秘島(遊樂場)
最後要介紹的就係神秘島(遊樂場)！地方好大，又非常少人，基本上除咗碰碰車都唔洗排隊，而挖泥機喺內地好多地方都要額外收錢玩，不過神秘島係免費任玩，2個小朋友玩咗N甘多次！
每人加¥20，可以入雪世界，¥20已包外套、鞋套，雖然裡面細，都係玩下滑梯，不過¥20/人，好抵玩，呢度既有無動力既嘢玩，又有機動遊戲，又有啲啱大童嘅刺激機動遊戲，加上超級少人，所以感覺上比星樂度更正！
總括而言，媽媽推介今次呢個套票就係超級抵，假期都係¥1250/一家四口，一晚房、早餐、遊樂場、動物園、溫泉！而她當時是在 WeChat 中旅珠海海泉灣度假區內預訂～
珠海海泉灣神秘島X無動力王國
珠海市金灣區升平大道西海泉灣度假區
圖文授權：有個過度活躍媽