澳門鄰近香港，而且花費又不算高，絕對適合一家大小 澳門親子遊 ！除了室外遊樂場、滑梯公園等好去處外，澳門的親子酒店亦有不少親子玩樂設施，Blogger MuiGs早前一家四口入住澳門「巴黎人」的天倫房，玩足3日2夜，以下為她提供的行程，有興趣去 澳門親子遊 的爸媽不妨參考一下！
澳門親子遊第1日
我哋今次係住巴黎人嘅天倫房，大概12點到酒店，好快就攞到房！其實呢間房我哋之前都住過，真係超鍾意！最大嘅原因係小朋友有自己嘅碌架牀同小朋友corner，爸爸媽媽又有自己張牀，真係啱晒一家四口！小朋友見到張碌架牀開心到飛起，當然係爭住瞓上格牀啦，好彩我哋係住兩晚，可以一人瞓一晚。
晏晝我哋食巴黎軒，喺巴黎人6樓。環境同嘢食都值一試，主要係喺鐵塔裏面食。作為一個遊客，呢個賣點都已經夠晒吸引！
食完之後，第一站就去巴黎人Playhouse「Qube Kingdom」，玩咗兩個鐘。呢個Playhouse有室內同室外遊戲區，室外主要有旋轉木馬同埋一個城堡造型嘅瀡滑梯。室內就有火箭造型瀡滑梯，波波池，switch etc. 夜晚行去倫敦人食自助餐 （呢個我覺得可以skip）。
我哋今次唔記得帶泡泡浴，諗住臨時去買，點知好多地方都斷晒貨。雖然冇泡泡，但係兩姊妹浸浴已經超happy。
澳門親子遊第2日
第二日行咗去新濠影滙食晏同埋玩Playhouse，新濠影滙PlayHouse超級大，有好多唔同樓層同埋區域。最正嘅係，價錢可以玩全日，總之你一路唔出嚟，就可以玩到佢哋閂門，我哋玩咗4個幾鐘，頂唔順要出嚟食晚飯。家姐最鍾意玩就係個跳樓機，玩咗好多轉！
夜晚我哋就上咗巴黎鐵塔睇風景，因為我哋係住客，可以免費上7樓，同埋37樓觀賞風景。Emma不嬲畏高，一上到37樓就腳仔都震埋。影咗幾幅相就返房開party。因為兩姊妹好鍾意間房，所以想好好enjoy吓。
文章獲MuiGs授權轉載
想知更多好去處，請按【親子好去處】