港版千島湖點去？最近天氣都無之前咁熱，最適合去行山，欣賞下靚景，放鬆下心情。今次雪梨媽就決定行下呢個bookmark咗好耐都未行嘅路線，去港版千島湖打卡！
港版千島湖位於屯門大欖涌水塘，係新界西北部最大嘅水塘。水塘有4條主壩，塘內有十幾個山丘同小島，形成咗千島湖嘅風景
千島湖嘅最佳打卡點，絕對係千島湖清景台，係漁護署於2019年喺麥理浩徑加建嘅觀景台，方便遊人可以安全咁觀賞千島湖嘅面貌、留影。
想到達觀景台，有唔同程度嘅路線可以選擇，今次雪梨媽帶住雪梨爸B，就決定行一條相對短同簡單，小朋友都可以輕鬆完成嘅路線：由掃管笏出發。
先由屯門市中心搭專線小巴，喺掃管笏落車之後，沿住馬路向天后廟方向行，經過公廁同羊棚繼續行，入到欄杆後嘅範圍會到達分岔位，轉右就可以行上麥理浩徑，跟住清晰嘅指示牌行樓梯就可以通往清景台。
呢條路線大概一個半小時就可以完成，適合大人細路。
較少遠足經驗嘅新手，加上風景怡人，假日一般都比較多人。
到咗清景台，就可以慢慢咁全方位同呢個迷你千島湖打卡，需要可以食返少少乾糧或者水果補充下體力。
今次雪梨媽同雪梨爸一齊行，就決定輕鬆啲，所以原路折返。如果大家有能力，亦可以延伸選擇將 大棠 設為起點或終點，如果撞正賞楓季節，仲可以順便觀賞埋紅葉呀～
___________________
撰文及攝影：雪梨媽 （Facebook : 雪梨家族吃喝玩樂Fun ）
想知更多好去處，請按【Mame好去處】