深圳有唔少室內動物園，今次Blogger MuiGs 介紹呢個——WOWO Zoo (寶安大仟里分店），佢大讚性價比最高！大家不妨參考一下啦！
MuiGs媽媽表示，其實呢個已經係佢一家人第3個喺深圳去嘅室內動物園，之前去過「野恩動物樂園」同埋「Lollypet」，媽媽形容「野恩動物樂園」地方大，但感覺唔係咁乾淨；而「Lollypet」就比較細，今次去咗WOWO Zoo，一比較之下，就覺得係3個之中性價比最高！
MuiGs媽媽表示以室內動物園嚟講都算大，企理，同埋真係好抵玩。一家四口入場費只需RMB180，價錢已經可以玩足全日，仲可以出出入入。一家人玩到一半去咗其他室內遊樂場玩，之後再玩返入去又得，中間又可以出去食午餐／晚飯，食完又可以返入去玩，好夠彈性！
另外，媽媽就覺得WOWO Zoo 最有趣的地方係，小朋友可以著水鞋仔同埋漁夫裝落水撈金魚，同埋餵雀仔都好特別！
兩個小朋友最鍾意玩嘅就係落水撈金魚，初頭望落去好似冇乜魚，所以建議佢哋唔好玩，但點知原來好多魚匿埋咗喺山洞入面。同埋都好容易撈到魚，閑閑地成桶撈咗出嚟，兩個小朋友都表示超好玩，仲玩咗好耐 。
另外仲好多動物仔可以餵吓，例如：草泥馬，花鹿，豬仔，貓，羊仔，雀仔，兔仔等等！其實價錢咁抵，真係好值得入去行個圈。媽媽表示真心推介！
WOWO Zoo (寶安大仟里分店）
地址：深圳市宝安区新湖路与海城路交汇处宝安大仟里L2-L268-269号
圖文授權：MuiGs