深圳玩到悶悶地？汕尾又會唔會考慮吓？而家番汕尾可以搭高鐵真係好方便，車程好快就到，又坐得舒服。早前Blogger 安妮媽媽親子日記 分享早前跟公公婆婆番家鄉汕尾探望親友，順便玩番3日2夜的美食之旅，連同酒店推介，大家不妨參考一下！
住宿方面，安妮媽媽一行9人今次入住4星級「汕尾顯達酒店」，酒店位於市中心，係高鐵站搭的士過去只需要10分鐘左右，行街、食宵夜、按摩都好方便。
酒店係宮殿式設計，酒店環境內外的設計都幾有氣派，風格很復古，門口有個大噴水池。雙床房房間空間好大，2邊都有大窗，可以望到海景，雙床房足夠2大2小一齊瞓都唔會覺得逼，房間乾淨舒適。
附近仲有幾個商場，大型商場有信利城市廣場，淨係飲品店都有好多間，廣場內有電動遊樂場、兒童遊戲室和好多餐廳。小型商場也有星河COCO City、顯達時代廣場和明珠廣場等。過對面就係海濱公園，可以散步吹海風。
行程方面，一家人去咗好出名的海珍迎喜皇宮飲茶，喺正酒店對面，自選式早茶，點心款式超級多，價錢仲好平，食得好滿足！親子遊又點少得網紅勝地「紅海灣」！海邊環境好大好靚，影到好多靚相。
宵夜絕對要推介二馬路，離酒店都只係10分鐘路程，除咗整條街都係美食店舖，每晚11點後仲有超多美食車出動，淨係諗食咩都會好苦惱，推介源記菜粿、宗記甜品、勝記鹵水和甜薄餅等，諗起都流口水呀！汕尾係沿海城市，當然唔少得食海鮮啦！即撈即製海鮮勁正！期待下次再嚟玩！
圖文授權：安妮媽媽親子日記