唔知依家仲有無「搬屋鋪路入名校」依個行動，但早幾年都仲盛行，工作圈中聽過最深刻的，有以下兩單：
（膽小慎看，雖然應該唔係太驚嚇！）
【搬屋鋪路入名校 個案一】
A因兒子入咗名幼，所以搬入太子道西租盤，幾十年歷史當然舊，但勝在夠大夠近學校，住咗幾個月，兒子開始成日講「埲牆人」，開頭無為意，後來細問兒子乜嘢係「埲牆人」，3歲幾嘅佢形容為白衫黑褲成日痴住埲牆嘅嬸嬸，再用手比劃有長頭髮紮在膊頭側咁⋯⋯
咁都好形象化吖，應該係媽姐（馬姐）嚟嘅～～
A也沒有大呼小叫大驚小怪花容失色，總之搵到屋就即刻搬喇！
【搬屋鋪路入名校 個案二】
B為好校網買咗樓，裝修好開學前就搬咗入去，開頭幾晚阿仔都喺佢哋間房瞓，半夜聽到佢口噏噏話好多bubbles⋯⋯
如事者過咗幾晚，晚晚都話見到好多bubbles，B開始覺得「唔對路」，就同自己阿媽講，老媽子就話「梗係入伙前無拜四角喇」，B就回「你都知我奶奶係教徒，點會肯搞依啲嘢！」
於是，兩母女某日趁奶奶出街就快快脆搞咗啲儀式，之後仲開哂窗通風散咗啲「香」味，B以為萬無一失，點知夜晚奶奶一回家，就衝去B面前大聲質問佢「搞咗啲乜？」
B矢口否認，懶鎮定咁話乜都無做過，點知奶奶一句「你乜都無做過佢哋點會棟哂喺門口呀～～～～」
所以啲人成日話新抱奶奶相處實有婆媳問題，依個例子就真係擦出新高度！
細思極恐係「佢哋」，有「哋」㗎，呼應咗阿仔嘅bubbles，有「s」㗎，無錯grammar無嘥學費喇！
**************
好喇，其實工作咁多年，都聽聽埋埋唔少奇人奇事，不過我個page係寫親子嘢，今次就只係寫返「親子界」嘅奇異事啦！你哋又有無聽過依啲「親子界」嘅異事呢？
撰文：BallsyMami
中年媽媽，認為「教養 ，不為養兒防老，只為免老來防兒」。