南丫島一日遊｜離島親子遊之中，南丫島都係熱門之一，南丫島有兩個碼頭，榕樹灣同索罟灣，同樣可以係中環碼頭上船出發。今次，雪梨媽就同雪梨B定咗索罟灣做起點。
南丫島一日遊-漁民文化村
索罟灣附近有漁民文化村，文化村其實係一個魚排，設有一個展館陳列舊時漁民嘅照片同用品，讓訪客了解更多著日嘅漁村故事，但收費平D就比較好。
除咗展品，亦設有各樣不同嘅遊戲，可以體驗漁民嘅生活，雪梨B都玩得好開心，跟住資深嘅漁民一齊學釣魚。此外，文化村內仲設有購物同飲食區，可以買到特色嘅紀念品同小食。
南丫島一日遊-行山篇
參觀完文化村，我哋就準備沿住家樂徑向榕樹灣出發，全程兩個鐘左右，個日天氣唔錯唔算太熱，中間經過觀景亭可以望到對岸香港仔、淺水灣等嘅景色。之後經過一個叫做神風洞的秘洞，個名都幾型咁，在洞穴內大聲叫會有回音。
南丫島一日遊-玩水篇
行到榕樹灣大街，雪梨媽同雪梨B都覺得肚餓，就決定搵間餐廳食野。大街都有唔少選擇，醫完肚，可以係大街行下，有唔少南丫島先有嘅特色店舖，係文青們嘅好去處。
行咗一陣，就帶住雪梨B過去大灣肚沙灘，當然要落水玩下啦，又唔太多人，都好適合小朋友去呀， 有充足的衷心設備及洗手間，由中午玩到黃昏，同發電廠嘅煙囪打卡，再行多10分鐘左右就可以見到一個白色嘅大風車。
其實佢叫南丫風采發電站，係全港首個風力發電嘅大型綠色能源建設，雪梨B都通過站內嘅展覽，學識咗更多關於再生能源嘅知識同保護環境嘅重要性。
南丫島一日遊-美食篇
最後係附近食埋碗又冰涷又香滑嘅豆腐花，晚上去雪梨媽朋友的威記海鮮酒家，食完豐富的海鮮餐先離開，價錢老實，海鮮保証新鮮，正！好充實嘅南丫島一天遊。
撰文：雪梨媽 （Facebook : 雪梨家族吃喝玩樂Fun ）
想知更多好去處，請按【親子好去處】