最近又開始進入迷信期，因為細女開始報中學⋯⋯不是不相信她的能力，而是這個機制受太多變數及彩數影響，多到做阿媽嘅我都好迷惘⋯⋯迷到買咗一批水晶回來增強能量！
10多年前初為人母，大仔好易病、郁啲就發燒，夜晚又成日喊，六神無主，奶奶話要放本老通勝在BB床頭，咁咪放囉！只要唔係畀符水佢飲就得！然後某天在美妝新品發佈會與同樣是新手媽媽的Brand Manager傾開，她甚至因為BB成日發燒所以叫咗阿媽去「查日腳」，未為人母的boss聽到我倆對話都不禁反白眼：「一個法國雜誌美容編輯、一個國際美妝品牌經理，居然會咁迷信？！」
點會唔迷？！即使平時係言之鑿鑿嘅無神論者，聲稱自己如何理性，只要一涉及子女任何風吹草動，也難免怕得要命，恨不得真係有個神顯靈畀我拜！
看過2012年諾貝爾文學獎得主莫言的一篇散文（收錄在散文集《不被大風吹到》），他憶述當年陪獨生女去高考，「坐在計程車上，看到車牌照上的號碼尾數是575，心中暗喜，也許就能考575分，那樣上個重點大學就沒有問題了。車子在路口等燈時側目一看旁邊的車，車牌的尾數是268，心裡頓時沉重起來。如果考268分那就糟透了。」一程的士，個心就七上八落幾次！
其實做父母，究竟要提心吊膽到仔女幾多歲？其實我前排做手術，我阿爸阿媽有無做出啲迷信嘅行徑呢？
撰文：BallsyMami
- 中年媽媽，認為「教養 ，不為養兒防老，只為免老來防兒」。