1
of 1
1
of 1

【獨家】曾志豪—老婆生仔你放咩假啊,爸爸?

August 10, 2018

我哋呢班打工仔,地位忽高又忽低。當你同老細講如果唔加人工就劈炮唔撈,老細一定會大聲同你講:「你當自己係乜嘢?公司多你一個唔多、少你一個唔少,好行夾唔送,唔好阻住哋球轉!」即係話,其實我哋小職員角色可有可無。


OK,當你接受咗自己細小如微塵嘅時候,你修心養性,同老婆製造下一代小生命,然後你去攞三日侍產假,老細忽然又同你講:「你放成三日咁多?仲話遲啲想放夠五日?你想公司執笠啊?放咁多假!間公司唔使運作㗎啦!」


突然之間,我哋嘅角色由螻蟻升到神枱至高無上嘅位置,竟然去到我哋放三日假咁大把就會搞冧間公司、同事老細「揦手唔成勢」咁嚴重?厲害了我的老細!究竟你想點樣?


男性侍產假其實不單單是打工仔放假嘅權益問題,而是各位爸爸的地位尊嚴問題!你想想,為何那些老細會肆無忌憚的批評男性侍產假甚至想取消?除咗老細天性孤寒鐸之外,更深層次的原因便是,他們覺得老婆生仔、老公係廢嘅,有媽媽已經足夠,爸爸係完全無用武之哋,所以順理成章,男性侍產假是多餘!


爸爸,你的名字是,多餘!爸爸,你的存在價值,三日嫌多!各位Daddy父親大人,你真的能吞這啖氣嗎?你真的覺得自己在照顧妻兒方面,是無價值、行行企企嗎?我以過來人的身份告訴你……也許是真的。如果老婆生仔有請陪月,基本上陪月打點一切,你可以消失。如果無請陪月,正常便有四大長老出面打點一切,你一樣可以消失。或許你可以留低招呼四大長老處理人際關係,這是很重要職責。


有聽眾報料,有些男人拿了三天侍產假美其名幫手照顧妻兒,結果那三天,他真的放了假!甚麼事都不幹!藉口多多,驚粗手粗腳整親個B,唔識點換片,唔知飲幾多奶先叫夠,唔夠膽同阿B沖涼……如果男士的侍產假要發揮真正作用,那些產前陪訓班必不可少,至低限度懂得換尿片和抱BB吧?但講認真的,過來人經驗,丈夫留在家中,即使亳無實戰經驗,但對於太太而言,已經是很重要的精神支柱。你可以做太太的出氣袋,聆聽她生產的不滿,可以幫她監視四大長老有無內鬥。


新手媽媽其實情緒不怎麼穩定,陪月只能從技術上幹活,但心靈上的「出氣」、「打氣」都只有老公才能勝任。甚至老婆不出聲,但當她知道你在身邊,已經足夠。即使你甚麼都不能做到,但飲頭啖湯,在孩子出生迎接回家的頭幾日陪伴左右,也是難得的經歷。


老細,平時打工仔射波都射咗唔止三日啦,公司冧咗未啊?但老婆無咗我三日,佢可能真係會頂唔順㗎!係咪我屋企出咗事你負責先?老細,記住我個名,我就係,一個爸爸。

 

------------------
作者:曾志豪,電台上的瘋show快活人 ‧ 電視上的頭條小豪子 ‧ 育有一毛孩二屁孩 ‧ 育兒信念:毋忘初衷,勿做怪獸 ‧ 育兒絕技:自創兒童故事。

更多曾志豪專欄:http://bit.ly/2JyN6Ia