1
of 1
1
of 1

【獨家】陳麒尹醫生—問心有愧

July 9, 2018

第四十五回


在剛開完team meeting的醫生房裏,「麒哥,點解頭先你唔反抗呀?」兄弟A在問我,「其實你絕對可以唔使理佢哋㗎,而且佢哋都唔應該就咁逼你做。」


「咪係囉,麒哥,你咁樣就白白應承老闆,聲都唔聲一下,真係唔似你平時喎……」兄弟F又在八卦插咀。「我仲記得你以前好兇狠㗎,麒哥,點解你去完北京就好似乖乖羊㗎?咁唔得㗎喎!」


「麒哥,你好似有啲唔同咗喎。」兄弟S一邊說,一邊在咬着他的麵包早餐。「點解覺得你聽話咗,唔出聲真係唔似你。呢個任務除非你自己都覺得OK?」


「兄弟們,一句到尾:我不入地獄,誰入地獄。」我冲着我的膠囊咖啡,「若果我唔默許,唔通我哋兄弟班又會有人想做?我其實係免去咗你哋嘅苦差。」然後接過那杯膠囊咖啡,坐低接着説:「第一,我覺得自己係有責任幫個team解困,我去北京深造就是這原因;第二,你哋未必能明白,佢哋係真係好需要我哋去幫手,因為我以前體會過。所以就算呢一刻我唔係乜都識晒,我都情願先行這一步。否則,我會問心有愧。」


當這時大家都靜下來思考的時候,Ray哥突然殺入我們醫生房。大家不由用分説即時圍圈而坐,Ray哥面帶着笑容,直頭係所謂四萬咁嘅口。「細佬,今朝你夠guts,你冇頂番李教授,自己一個孭晒,佩服!第時啲大肚婆就靠你喇!哈哈!」這是典型的Ray哥招牌笑聲笑容。


「知道Ray哥!我這回係正一牛唔飲水……算啦,我知你明嘅。咁我想問下我實質要孭起啲乜嘢任務呢?我真係乜都唔知道㗎!」其實我又真是很天真。靠的,就是那種「大無畏」精神。「細佬,你暫時不要太過擔心。你只需要接手專科門診便可以了。不過,這門診現時是同時包括門診及同日的心臟超聲波檢查。你可以諗一諗有沒有辦法去改善一下,使那些大肚媽媽不用等太耐便非常好了。」「明白,我會盡力去了解門診和心臟超聲波檢查部那邊的情況,嘗試循一站式的方針去辦。」


可惜,門診服務一向都十分死板。無可否認,礙於樓面面積有限與及現在的專科門診確又是五花八門,若要提供一站式臨床、心電圖及心臟超聲波檢查真是極不容易。最理想化當然是孕媽媽可以一次過做晒所有檢查,但又不需要有太長的等候時間。始終大住個肚,無論坐、企、等、行和上廁所都相當不方便。


雖然今天未必有即時的方案去應對,但我深信終有一日可以找到更有效的辦法。現在,只能用最大的力度,去為未來展開「妊娠心臟科門診」的一事而盡力!

 

--------------------

作者:陳麒尹醫生,香港大學心臟科名譽助理教授,2003年於港大醫學院畢業,加入公立醫院內科部接受內科及心臟科培訓;2010年考取專科資格後全面投身導管介入治療及通波仔工作,成為24小時緊急通波仔團隊骨幹成員。與此同時,有志於治療有心臟毛病的高危孕婦與及患有先天性心臟病的成年人。
 

更多陳麒尹醫生專欄:http://bit.ly/2IwjDim