1
of 1
1
of 1

【獨家】 曾志豪—世界盃教仔法

July 6, 2018

蟄伏數周,只為忙於訓練跑步和觀戰世界盃。40年的人生都是和豬朋狗友看世界盃,今年終於迎來和兒子看球。雖然,他不懂看。
 

所以出現了以下的情景。難得家中開電視,世界盃激戰進行,大銀幕把小傢伙吸引住了。「阿B!陪爸爸睇波!」我已經幻想他和我穿著同一件波衫看足球的畫面。男孩子嘛,血液中肯定有足球DNA。他看了大銀幕幾秒鐘,然後大叫,「轉啊!我唔要睇呢個啊!」


吓?西班牙對葡萄牙?你說轉台?「爸爸!轉啊!我要睇動物!」吓?睇動物?他要看野生動物頻道。獅子老虎和四年一次的世界盃相比,任何理性的成年人都知道如何選擇,但不幸的是,曾小B不是理智的成年人。「阿B其實踢波好好玩㗎,不如你望下……其實人類都係動物嚟㗎……OK唔使喊,我轉台,睇動物啦!大笨象出場啦!」我屈服,1比0。我只能讓出大電視,自己掏出手機看「細Mon足球」,兒子一邊看獅子比我看球更緊張。後來我終於扳回一城。

 
美式快餐有足球套餐,加錢可以換一個Line的足球主題公仔。我買了一個兔仔球證,手上還縫了兩張「紅黃牌」,非常細緻。「係阿B,知道呢個係咩嚟嗎?球證啊!佢睇住啲哥哥踢波,有無人犯規,即係有無人曳曳。然後就會用黃牌警告佢,再犯規就用紅牌罰佢離開無得踢波。」曾小B聽完雙眼發光,興緻勃勃,和我玩起「扮球證」遊戲。要我拿起各式各樣的毛公仔,豬啦牛啦馬啦馬騮啦恐龍啦,全部踢波犯規,曾小B便興奮的拿著球證兔公仔向我警告,「我畀個黃牌你!你曳啊!」「球證,畀次機會得唔得?」「好啦,你走啦!」「多謝球證……哎喲,我又犯咗規喎!」「哦,紅牌!我罰你竟然要走?」

 
一個晚上,他把全屋的毛公仔都罰了出球場,好大官威的球證。入睡前,我拿起球證公仔「落藥」﹕「阿B,球證有紅黃牌,即係我哋可以畀一次機會啲哥哥做錯事,第二次就要出紅牌趕佢走。所以如果你第一次曳曳,爸爸可以畀你一次機會。如果你跟住再曳,咁爸爸就要出紅牌,趕你走!得唔得?」
他當然滿口答應。然後一餐飯,他貪玩不肯食,我拿出球證公仔﹕「阿B!第一次警告,畀張黃牌你。你再唔聽話,就要出紅牌,罰你㗎啦!」

 
曾小B居然聽明白,然後便好辦事了:他食飯要三催四請/睡眠不足/動手動腳,全部都出示黃牌。而為了避免下一張變成紅牌,他便不敢胡亂搗蛋,聽父母的話!奇蹟啊,一個球證公仔的紅黃牌令曾小B玩得樂此不疲!也明白自己只有兩次犯錯空間,他還真的冷靜下來,變得聽話!


嗶嗶!你犯規,黃牌!


------------------
作者:曾志豪,電台上的瘋show快活人 ‧ 電視上的頭條小豪子 ‧ 育有一毛孩二屁孩 ‧ 育兒信念:毋忘初衷,勿做怪獸 ‧ 育兒絕技:自創兒童故事。

更多曾志豪專欄:http://bit.ly/2JyN6Ia