1
of 1
1
of 1

【獨家】 曾志豪—同阿仔屙尿的事

May 17, 2018

曾小B學戒片時,我們鼓勵他上學如果急急要告訴老師。「阿B,如果你上堂想去廁所,要點同老師講?」「老師,我想去屙尿尿。」「叻仔!講得好!我哋試多次!上堂想去廁所要點講啊?」「老師!我想去屙尿尿!」「得啦得啦,唔使咁大聲,成條街望住你啦!返去表演畀媽媽睇等佢開心吓。」


天真的爸爸帶同天真的曾小B回家天真的向老婆表演。「媽媽!我會同老師講,我要屙尿尿!」我身為教練,臉露得意笑容靜待老婆稱讚我調教有方。老婆臉色一沉:「你做乜咁樣講㗎!咁核突!」啥米?咁核突?咩事?錯在哪裏?老婆開估:「唔要講屙尿尿,要話去小便!」


一排烏鴉在空中飛過。媽媽,我已經用咗孩子專利的叠字法講「屙尿尿」啦喎,已經好可愛啦!很難想像一個三歲小孩子講「我想去小便」,難道要說「我去沐浴、更衣、就寢」?

 
戒片過程很痛苦,不但對孩子痛苦,對家長更是災難。我明白,他始終要戒片,但當你睡到半夜突然摸到成張床濕透,原來有人瀨尿,然後全家總動員起身、換床單、沖涼、換衫,還要夾雜狗吠聲曾小小B的哭聲……你真的希望:「不如聽日先戒片好唔好?」

 
戒了片,最大好處便是經常有親子去廁所時間。行商場,人有三急,夫妻互望一眼,「老公,都係你同個仔入男廁啦,佢喺女廁會屙到條褲濕晒。」這個理由,掩蓋了老婆想躲懶休息的真相。

 
男廁如果有小童尿兜還好,他高度剛剛好能自己解決;如果只有成年人的尿兜,便是玩雜技的時間。我試過抱他站在我的腳面,我用力踮腳把他升高去屙;還是不夠高的話,只能雙手抱起放在我大腿,提腿曲膝,像吊臂一般升高。

 
日子有功,現在曾小B發展到自己去廁所,謝絕探訪。有時放心不下偷偷走到廁所旁觀,他會很生氣的說:「你唔好偷睇啦!你走啦!」就讓孩子獨立一次吧,我瀟灑離開……


唔夠一秒,稚氣童音傳出:「爸爸幫我著番條褲啊唔該!」

 

------------------
作者:曾志豪,電台上的瘋show快活人 ‧ 電視上的頭條小豪子 ‧ 育有一毛孩二屁孩 ‧ 育兒信念:毋忘初衷,勿做怪獸 ‧ 育兒絕技:自創兒童故事。