fbpx

【獨家】曾志豪—數到30,我個仔便哭

話說有一天在家中忽然興致高漲,和曾小B玩捉迷藏,媽媽自告奮勇匿埋,曾小B當然就要去捉,我做裁判。「阿B數30聲然後就去搵媽媽啦。開始!」

「1,2,3,4,5,6,7,8,9,10……」數完就想找媽媽。我急忙阻止。「阿B,數到30喎。你數咗10咋。」「我唔數。我唔要數到30。」「阿B,唔要奸茅,數完先。」「我唔數!我唔要數!我唔識數啊!」他突然來了一個排比陳列、層級遞升的語氣推進,愈講愈大聲,而且聲音開始有點哽咽……不是吧?激動得想哭了?我莫明其妙,我沒有做錯甚麼啊?不就是叫他數到30嗎?

我以為他偷懶不肯數,惟有相勸:「阿B,唔好發脾氣先,數埋先。」「我唔數!我一定唔數!我唔識數啊!」他已經變成超級撒亞人!他尖叫號哭找媽媽。

我怎麼又變成拐子佬了!由於我的家居很大,成幾百呎咁大,阿B一下就找到媽媽藏身之處,但大家都知道那不是重點,他為甚麼發脾氣才是關鍵。這個任務只能交由福爾摩師奶──我老婆處理。

我心急如焚,各位觀眾,你覺得曾小B為甚麼不肯數到30?究竟發生甚麼事了?我數到30便開估,1,2,3,4……好啦好啦,我也不想數啦。

原來,他在學校數數目時被同學取笑,正正就是取笑他數不了1到30。我的蒼天啊!居然遇到了校、園、欺、凌!幼稚園階段。K2。

我思潮起伏,應該安慰他「邊個生出嚟就識數數目啫!唔使理佢!」但會否又變成縱容他不好好學習呢?下次他可能以此作擋箭牌,拒絕學習,得不償失。還是老婆厲害,眉頭一皺,計上心頭,朱唇微啟,吐出金句。「阿B,你同佢講,我唔係唔識,係未學識。」

「唔係唔識」VS「未學識」!唔係自誇,我覺得老婆這個定義非常清晰合理到位。「唔識」好像定了案不得翻身成世都唔識, 「未學識」的前提是承認自己不懂但只是火候不足時間未到遲早也會學懂。即使對大人也是很有鼓舞作用,「無錢」VS「未發達」、「單身狗」VS「未搵到伴」,就是「絕望」和「希望」的分別。

我這個老竇也不讓媽媽專美,加插例子。「阿B,好似細佬佢唔識行路,我哋可唔可以笑佢啊?唔可以啊嘛,因為佢咁細個都未學識行路,但佢大啲就自然學識㗎啦。」曾小B點頭。「所以同學笑你唔識數數目係佢唔啱,你唔使驚唔使唔開心。不過…… 」我話鋒一轉,「不過如果細佬好似你咁大讀K2仲唔識行路,咁就真係會俾人笑㗎啦,所以我哋都要學習㗎喎。」曾小B又點頭,可能他都有點頭暈了。

後來的事情便簡單了,和他再玩捉迷藏,鼓勵數數目,告訴他學識了便不怕被人取笑。他很快便戰勝心魔。然後,我們把握每個機會訓練他。「阿B!你做錯事!同我冷靜一分鐘先……唔使啦,你同我數到30先可以去玩!開始!」

1,2,3,4,5,6,7,8,9,10,11,12,13,14……

 


作者:曾志豪,電台上的瘋show快活人.電視上的頭條小豪子.育有一毛孩二屁孩.育兒信念:毋忘初衷,勿做怪獸.育兒絕技:自創兒童故事。

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.