fbpx

【獨家】曾志豪—做老竇要玩得起之我如何呃個仔食戰鬥豆腐

題目好長,咁先有霸氣,放心唔係呃稿費,因為唔係逐字計。

做老竇四年了,最大感覺便是:做老竇要玩得起。嚴肅認真板起臉孔的工作交給媽媽扮演,她們天生便是管理能手。所以你在太太心目中,也只是一個已經戒了尿片的細路。

甚麼叫「玩得起」?譬如你可否摒棄學術而改用不學無術呢?具體例子,勸小朋友著衫。想叫小B著一件背心,但花了九牛二虎之力,即使窗外狂風呼嘯,他就是不肯多穿一件背心。如果你用學術方法,肯定是「不穿衣服會著涼」、「著咗背心暖好多」。我甚至都用了恐嚇方法:「你係咪想病病,睇醫生打針!」誰知小孩子想了一會答我:「好啊,帶我去見醫生啊!」吹脹!

後來唯有「不學無術」,同佢玩。「嘩!呢件黃色嘅戰鬥背心,好似係Bumble Bee裝甲喎!著咗好有型啊!」你唔好問我點解背心係裝甲,我只係用「黃色」聯想到「大黃蜂」,找共通點嘛。結果曾小B中招受騙,興高采烈的一起裝扮變身:「好!我哋著黃色戰鬥背心!出發!」

其他顏色聯想包括「紅色長褲等於消防員救火」,也試過把一件外套手袖位的一個普通啪鈕,說成是「機甲人發射導彈的裝備」,引得他穿了外套後,不停解鈕扣鈕,始料不及。我要承認,這些玩的招數並非百發百中,如果你30度想佢著風褸,即使你吹到變黃金聖衣,他應該也是Say No,但至少用玩的方法入手,穿唔到衫也不會傷感情。

食飯也是另一頭痛位,我也用了一次「玩」的方法對付曾小B。我的目標是「呃B食豆腐」,我真係想佢食豆腐,於是順口開河、一臉正經:「阿B,你知唔知呢嚿係咩呢?」「唔知。」他期待我的答案。「係,戰鬥豆腐。」我忍住了笑。

戰.鬥.豆.腐。他雙眼發光,「吓?咁犀利?」我堅定信念講完大話:「無錯!食咗就會有好高戰鬥力!你睇吓個豆腐係黃色嘅,佢就可以打贏黃袍怪!」係,呢排同佢講西遊記,所以他轉左channel,知道有黃袍怪。他二話不說,馬上大口吞食豆腐……Sorry係戰鬥豆腐。

事後他很興奮向媽媽匯報:「媽媽今日爸爸請我食戰鬥豆腐啊!可以打贏黃袍怪!」媽媽整個傻了眼,加黑人問號符號:「咩戰鬥豆腐啊?」戰鬥豆腐就是,同個仔玩遊戲囉。戰鬥豆腐就是,個仔仍然有童真。

各位爸爸,承認你也是大細路的身份,跟我一起唸口訣變身玩吧!一二三,「戰.鬥.豆.腐!」

  • Facebook Error: Please check the details entered.
  • Follow164Followers
  • YouTube Error: Please check the details entered.

Zeen is a next generation WordPress theme. It’s powerful, beautifully designed and comes with everything you need to engage your visitors and increase conversions.